Sri Valmiki Ramayanam _ Baala Kaandam_ Sourashtram Language (Tamil Script)

ஸ்ரீராமஜெயம்

இராமாயணம் (ஸௌராஷ்ட்ர பா4ஷாம்)

பா³லகாண்டோ³ ப்ராரம்பு

ஸ்ரீராமசந்த்³ரஸ்ஸரித பாரிஜாதஸ்

ஸமஸ்த கல்யாண கு³ணாபி⁴ராம:

ஸீதா முகா³ம்போ⁴ருஹ சந்த³ராகோ

நிரந்தரம் மங்க³ள மாதநோது.

விவரிணி

ஸ்ரீமத் காம்யகாவனிமு, பீ4ம அர்ஜுன நகுல ஸஹாதே3வ த்3ரௌபதி3 ஸஹித ப4வணுன் ஸர த4ர்மரஜொ வஸிலேதுன் ர:த, ஒதி3மெந்த மார்கண்டே3ய மஹாமுனி த4ர்மரஜொ வஸிலேதுன் ரி:யே வனமுக் அவ்தொ, த4ருமரஜொ தெ3க்கினு பை4னுகு ஸரக4ல்லி திரகவின் ஹிப்3பி3னு ஸாஷ்டாங்க3 நமஸ்கெரினு தீ3 ஹாதுன் ஜெதொ கெரிலி பாஞி பொடி3னு ஸரபொ3ல்லி ஜெயி(ஜி) பர்ணஸாலாமு கெ3கி3னு உன்னதா3ஸனு ஹோரு பி3ஸடி3னு புஜெ கெரிகின் அர்க்4ய ப்ராதா3னுன் தீ3டி3னு, ஹோ ஸ்வாமி ! தும்ரெ அவ்னி லெந்த தெ3க்குதாமம்ரொ பாபுன் ஜ2கை3னு அமி புண்ய புருஷுன் ஹொயாஸி. பு2ள்ளோ ஜன்மு(ஜெலும்மு) புஜாபோ2ளு லெந்த தும்ரெ த3ர்ஸனொ ஹொயெஸி.

ஹோ முனிஸத்தமா, த்யே ஜயத்3ரது2 மென்னாரு அம்கொ கெரெ ஹிம்ஸானுகினு, துண்ட காமுன்கினு த்3ரௌபதி3கு ஸபா4மு கெரெ ஔமான்கினு அபுல் வனவாஸின் ஹொய்யவினு ராணும் ஹிண்டி3 பி2ரி பொட3துன் ரி:யே பா3தா3னு ஸங்கி3 து3:கு2லுத, மஹா தபஸ் ஸ்ரேஷ்டு2 ஹொயெ ப்4ருங்க3 முனி ஸெய்னு, ஓ த4ர்ம ரஜா ! தூ பொட3துன் ரி:யெ பா3தா3னு கோன் கொத்3தி3கு. முல்லோ த3ஸரத2 மஹாரஜாகு பெ3டொ ஹொயெ ஸ்ரீராமசந்த்3ரு மென்னாரு பித்ரு வாக்ய பரிபாலனொ கெருவென், ஸீதா லக்ஷ்மணுன் ஸர த3ண்ட3காராணுகு ஜெயி ஹிண்டி3லேதுன் ர:த தெகா ஸதி ஹொயெ ஸீதாகு ர:வண் அவி சொரிலி ஜத ஜானகீபதி வானருனுகு ஸரக4ல்லி ஸேது ப4ந்த3ன கெரினு லங்காமு கெ3கி3னு ராவணாதி3 தா3னவுனுகு மரினு ஸீதாகு பொ3ல்லி கா3முகவினு பட்டாபி4ஷேக்து ஹொய்னு ராஜாங்கு3 ஸௌனெஸி மெந்த……….

த4ர்ம ரஜொ ஐகினு, ஓ முனி ஸ்ரேஷ்டா2 ! ராமொ மென்னாரு கோன்குலோத்3ப4வு ? ராவணொ மென்னாரு கோனு ? ஸீதா பஹரணொ கொகொலெந்த கெர்னொ ஹொயெஸி?  ஸ்ரீராமசெந்த்3ருக்கினு ராவணாஸூருகு மாரு கிஸோ சலெஸி ?.... ஏ விருத்தாந்துன் ஸங்கு3னொ மெனி ராமாயண பாராயண கெருவென் பொ4ரி தாங்கு3 ஹொய்லி புஸதுன் ரி:யே த4ர்மரஜாகு ஸெய்னு ப்4ருக ரிஷி இஸொ ஸங்க3ஸு.

ஓ த4ர்மரஜா ! இக்ஷ்வாகு வம்ஸிமு த3ஸரத2 மஹாரஜொ மென்னாரு தீ2ன் பை3லென் ஸர ராஜாங்கு3 சல்விலேத் அவ்தொ கௌஸல்யொ மெனத்திகொ ஸ்ரீராமசெந்த்3ருகினு கைகேயிகு ப4ரதுகினு ஸுமித்ராகு லக்ஷ்மண, ஸத்ருக்4னுனு உஜ்யாஸி. எமொ ராமசெந்த்3ரு மென்னாரு ஜனக மஹாரஜாகு பெ3டி ஹொயெ  ஸீதாதே3விகு ஹொராடு3 கெர்லெஸி. அத்தொ ராவணோத்பத்தி ஸங்கு3ஸு ஐக்கி.

முல்லொ ஸ்ருஷ்டி கர்தொ ஹொயெ கமலாஸனு புலஸ்த்யு மெனெ த3னுஜாகு ஸ்ருஜெஸி. ஏ புலஸ்த்யு வைஸ்ரவணுகு ஜெனெஸி. தெனொ பா3புகு ஸொட்3டி3னு மொ:ட்டொபொ3 ஹொயெ விரிஞ்சிகு பொரி தபஸ்கெரினு நலகூப2ரு மெனெ ஒண்டோ பெ3டொகினு லோகபாலனொ கெருவென்கினு, த4னாதி4பதி ஹொயி ர:வென்கினு, லங்கா நக3ரிகு ராடொ2யி ர:வென்கினு கொங்கி ஸரா திகொ3 நீ:த்தொ ர:வென் வருன் க2ள்ளி மஹாவிபூ4தி ஸர ஜிவிலேதுன் ர:த (விபூ4தி,பூ4தி பை2லாதி3 ஸகல ஸம்பத்துஸர ஜிவிலேதுன் ர:த) புலஸ்த்யு தெ3க்கினு போட் ஜெளிபொடி3 தெகொ நஸாது கெருவென் ஹட்விலி அபுல் ஹம்ஸாமு தொகன் விஸ்ரவஸுகு (விஸ்ரவஸப்ரஜாபதிகு) ஸ்ருஜெஸி. த்யே பெ3டாகு பொ3வினு தூ ஜெயி வைஸ்ரவணுகெ (குபே3ருகெ) ராஜாங்கு3 நிராங்கு3 ஹொய் ஜவென் நஸ்தினாவி (நஸ்தி ஆவி) மெனி ஸங்கி3 த4ட்3டு3த ஹோந்த3கு மெந்தி குபே3ரு ஜோள் அவினு, ஓ மஹாத்மா ! மொகொ அபுல் பெ3டொ ஸொகொ ப4வுனொ மெல்லுத, ஹோந்த3கு மெனி ஸ்ருதகீ3த வித்3யா நிபுணுன்ஹொயெ ராக்ஷஸாளினுமு புஷ்போத்கடம், ப3கொ, மாலினி மெனெ தீ2ன் லேமுனுகு பரிசாரு கெருவென் ஸங்கி3னு த4ட்3டு3த த்யே தி2னூ லேமுன் தபஸு கெரிலேதுன் ரி:யெ விஸ்ரவஸ ப்ரஜாபதிகு மொன்னு ஸ்ந்துஷ்டி ஹோத்திஸொ பரிசாரப்பன் கெரிலேதௌத அங்கொ புத்ரபோ2ளு தி3யெஸி. புஷ்போத்கடம் மெனெத்திகொ ராவண கும்ப4கர்ணுன் கினி, மாலினி மெனத்திகொ விபீ4ஷணுகினு, ப3கொ மெனத்திகொ க2ரொ மெனி ஒண்டொ பெ3டிகினு ஸூர்பணகொ2 மெனெ ஒண்டொ பெ3ட்கி உஜ்யாஸி.

பா3பு தெ3க்கினு த்யே பஞ்சூ பா3ளுனுகு ஜாதகர்ம நாமகரணாதி3ன் முஸடி3னு தொ3ளாகு ர:கெ மேஸுன் ஸொகொ பரிபாலிலேதௌத, எமொ ராவண கும்ப4கர்ணுனு பெ4ளிஸூரவீர பராக்ரமஸாலின் ஹொயினு லோகஸ்கொ த4க்குலத்திஸொ கெர்லியாஸி. விபீ4ஷணு மென்னாரு ப4வண் ஸொகொ ஸந்த்4யா கா3யத்ரி ஜபதபாதி3ன் கெரினு ஸதா3 தே3வநாம பாராயணம் கெரிலேதுன் ஹொதெஸி. க2ரொ, ஸூர்பணகா2னு ரிஷின் ஆஸ்ரமாகு ஜெய்னு ஹோமகுண்டோ3 நஸினு ரிஷினுகு தெ4ரி ஹிம்ஸினு பாபகர்முன் கெரிலேதுன் ஹொத்யாஸி. பா3பு ஜோளு ஸகல வேத3வேதா3ங்க3 த4னுர்வேத3 பாராயண கெரிலேதுன் க3ந்த4மாத3ன தொ3ங்க3ருர் வஸிலேதுன் ஹொத்யாஸி.

திஸொ ர:தொ ஒதி3மெந்த விஸ்ரவஸ ப்ரஜாபதிகு தெ3க்குலனவே வைஸ்ரவணுகு (குபே3ருகு) ராவணஸூரு தெ3க்கினு பா3பு ஜோளு புஸி தபஸு ப3ல ஸக்திஹால் ஜுட3ள்யஸி மெனி களைலினு,  அபுலுமெள்ளி தபஸ் கெருவெனொ தினு ஒண்டொ ரேம்மு ஹோமகுண்டொ3 பெட்வினு ஹூனு காலுமு ப3ட்3பா3க்னிம்கினு பொவுஸு காலுமு பனிம்கினு வஸந்த காலுமு வரொ பானம் கெரிலீ பஞ்சாஸனுகு பொரி வைராக்3யு வஹிலி தபஸ்கெரிலேத் அவ்தொ, கும்ப4கர்ணு மென்னாரு ஒண்டீஸ் மொன்னு வவிலி மஹோக்3ருஸர ஸ்வாஸ ப3ந்த4னொ கெரிலி தபஸ்கெருத விபீ4ஷணொ வ4வண் ஸொக நித்ய கர்மானுஷ்டானுன் சல்விலேது ஸதா3 தே3வ நாம பாராயண கெரிலேதுன் பெ4ளி ப4க்தி நியம நிஷ்ட2ரு ஹொதெஸி. க2ரொ ஸூர்பணகா2னு தெங்கொ பஜெ தா4னுகு பரிசாரப்பன் கெரிலேதுன் ஹொத்யாஸி.  ஏதா4னுகு ஸஸரு ஒர்ஸு லெந்து யாகு3 சல்விலேதவினு த3ஸமுகொ2 ஒண்டொ தொ3ஸ்கொ ஹெடி3னு ஹோமகு3ண்டா3மு ஹாப்தி தி3யெஸி. ஏதா4னுகு ஸஸரு ஒர்ஸு ஒகாளு ஒண்டொ தொ3ஸ்கொ தா4னுகு நொவ்தெட்3வொ ஹெட்டைதி3னு மொன்னு தைர்யு வஹிலி அக்3னிகா2ப்தி தெ3வென் தெ3ஸ்வொ தொ3ஸ்கொ ஹெட3ன் நிகிளுத ஸொன்னாபோடு பிரஸன்னு ஹொய்னி தீ3வன கெரினு கொ2ப்3பி3 ஸொகொ தெ3ஸ்ஸூ தொ3ஸ்கான் தீ3டி3னு ஓ பெ3டா ! தொரொ யக்3ஞொ ஸந்துஷ்டி ஹொயெஸி. அமரத்வம் ஜத பஜெவருன் மகி3லே மெந்த த்யே நிஸாசரு ப்3ரஹ்ம தே3வுகு ஸெயினு, ஹோ தே3வ தே3வா ! ஸமஸ்த பித்ருதே3வ தே3வ யக்ஷரக்ஷ க3ந்த4ர்வுனுகு ராடு ஹொய் ர:வென்கினு, ஹட்வெ ரேமுனுகு ஜெய்யவென்கினு மொகொ ஜிகு3வென் திகொ3 நீ:த்தொ ர:னொ மெனி வருன் மகு3த, பரமேஷ்டி ஸெய்னு தூ மகி3லெத் தெமொ மானவுன் ஜத கொங்கிலெந்த மொரன் நீ: மெனி வருன் தீ3டி3னு………………

கும்ப4கர்ணு ஜோள் அவிகினு, தொகொ பஜெ வருன் மகி3லெ மெந்த கும்ப4கர்ணு நித்யானந்து3 மகு3வென் மொன்னும் ஹட்விலி, நித்2ரானந்து3 மகெ3ஸி. த்யே தா4னுகு வருந்தீ3டினு, விபீ4ஷணு ஜொவள் அவி பஜெ  வருன் மகி3லெ மெந்த லோக ஸ்ருஷ்டி கர்தொ ஹொயெ விரிஞ்சிகு ஸெய்னு தீ3 ஹாதுன் ஜெத கெரிலீ பாஞி பொடி3லி மொன்னும் ப4க்தி ஹோரு நுதி கெரிலேதுன்,  ஹோ ஸ்வாமி ! மீ ஏ பு4லோகுரு ரெ:யினு ப்ரலோகுகு ஜாலெந்து ஸதா3 தே3வ த்4யான் பாராயணொ கெருவென்கிணு கொன்னி காலுமு பி4ன்னௌனாத்திஸா ஒண்டொ ப்3ரஹ்மாஸ்த்ரொ தெ3னொ மெனி மகெ3 வேங்கு3  பத்3மாஸனைகினு அதி3ஸம் பொடி3னு ஓ பெ3டா ! தூ  ராக்ஷஸ வம்ஸும் உஜிகினு ப4வண் ஸொகொ தே3வ நாம பாராயணொ மகெ3த்தெக லெந்த தொகொ கொன்னி காலுமு பி4ன்னு அவ்நாத்திஸா ஒண்டொ ப்3ரஹ்மாஸ்த்ரொகினு அமரத்வம் தி3யெஸி மெனி ஸங்கி3தினு தேடூஸி அந்தரங்கு3 ஹொயெஸி.

த3ஸானனொ ப்4ரஹ்ம ஜோளு வருன் க2டெ3 கெ3ருவு வஹிலி கின்னரேஸு ஹொயெ குபே3ரு ஸர ஜெ2கு3டா3கு நிகிளெஸி.  வைஸ்ரவணைகினு மாருகு த4க்கிலி யக்ஷகின்னரகிம்புருஷ க3ந்த4ர்வாதி3னுகு புஷ்பக விமானும் ஹிங்க3ள்ளினு க3ந்த4மாத3னு ஹோரு அகாஸுவாடும் ஜெயிலேதுன் ர:த  விஸ்ரவஸ ப்ரஜாபதி தெ3க்கினு எனொ கு3ருத்3ரோஹி மெனி ஹட்விலி,  ஹிங்கி3ஜாரியொ விமானு திகா3வொஸொ ஹொவென் ஸாபனொ தி3யெஸி. த3ஸமுகொ2 லங்காமு ஜெய்னு ஸகல ராக்ஷஸுனுகு அபுல் வொஸொ கெரிலி லக்ஷ்மீகடாக்ஷம் ஹொயெ நவரெத்தனுன்கினு வஸு பை2லாதி3 ஐஸ்வர்யுன் ஸர ஸுக2 ஆனந்து3ரு ஜிவிலேதுன் ஹொதெஸி.

ப2ல்லொ, இந்த்3ராதி3 தே3வுனுகு ஜிகி3னு பு4லோக் அஸ்கொ ரவணொகெ கெரத்தெக லெந்த ராவணுஸூரு மெனி நாவு ஜுடள்ளினு தே3வேந்த்3ராதி3 ஸகல தே3வுனுகு தெ4ரி கிங்கருன் கெர் தொ2விலி பூ4தக3ண  தே3வக3ணாதி3னு த4க்குலத்திஸொ கெர்லெஸி.  ஹிம்ஸானு ஸஹன் முஸுனாத்தொ ராஜரிஷி தே3வரிஷி பை2லாதி3 தே3வுன் மிளினு பிதாமஹு ஜோள் அவி கினு ஹிம்ஸானு ஸங்கி3 ரொடுலுத,  ஐகினு அஸ்கி தே3வுனுகு ஸர க4ல்லி தூ3து ஸொந்து3ரு தீருகவினு ஸெஸாயி ஹோரு ஸயனொ கெரிலு ரி:யெ ஸ்ரீவிஷ்ணு தே3வுகு ஹட்விலி பு4லோகுரு ராவண கும்ப4கர்ணுனு லெந்த பொட3துன் ரி:யெ பா3தா3னு நிவாரணொ கெரினு அம்கொ  ரக்ஷுனோ மெனி ஜுகு3 விதுனும் நுவிலேதுன் ர:த……………

து3ஷ்டநிக்3ரஹ ஸிஷ்டபரிபாலனாகு கர்தொ ஹொயெ ஆதி3 மஹாவிஷ்ணு ப்ரஸன்னு ஹொய்னு, தே3வுனுகு ஸெய் ஸங்க3ஸு. ஓ தே3வுன்வோ ! முல்லொ ராவண கும்ப4கர்ணனு அகோ4ரதபஸ் கெரினு ஏ வாரிஜாஸனுகு த்ருப்தி கெரினு வருன் க2டி3 கெ3ருவு வஹிலி ஸேத்தெனு.  வருநௌஸருமு ஸாகா2 மூகு3ன்கினு நருஞத தே3வ தே3வ க3ந்த4ர்வ யக்ஷக3ணுன் ஹாலி மொரன் நீ: மெனி வருன் க2டி3 ரி:யாஸி ஹாலிமு மீ நராவதாரு க2டி3 அஸுருனுகு ஸம்ஹிரினு தும்கொ ரக்ஷுஸு. கை த4க்குனாங்க3ன். துமி அபுலபுல் ஹம்ஸாநுமு வானர ப4ல்லூகான் ஹொய் உஜோ. மீ பு4லோகுரு புத்ர காமேஷ்டியாகு3 கெருவென் யதிலேதுன் ரி:யெ த3ஸரத2 மஹாரஜாகு த4ர்மபத்னி ஹொயெ கௌஸல்யாகு ராமசந்த்3ரு ஹொய் உஜு. லக்ஷ்மி தே3வி ஸீதொ ஹொய் உஜயி. ஆதி3ஸேஷு லக்ஷ்மணு ஹொய் உஜயி. மொரொ ஸங்கு3 சக்ருனு ப4ரத ஸத்ருக்4னுன் ஹொய் உஜனு மெனி ஸங்கி3 த4ட்3டு3த,  தே3வுனு ஸ்வாமி ஜோளி ஹோகுலீ அபுலபுல் ரேமுனுகு ஜைனந்த்3யாஸி. ஸ்வாமி ஹோகு தா4னுகு அபுலபுல் ஹம்ஸானும் ரி:ஹொயி வானர ப4ல்லுகான் ஹொய்னு தெக தெக தே3ஸினுமு வஸிலேதுன் ஹொத்யாஸி.

தீ³ஸுகுலமுஜா ப்ரபா⁴வு ஸங்கி³னி

ஓ த4ர்மரஜா ! பு2ள்ளொ நித்யஸ்வரூபி ஹொயெ ஸ்ரீவிஷ்ணு தே3வு லோகுஜாவு கெருவென் ஹட்விலி ஸ்ருஷ்டி கர்தொ ஹொயெ சதுர்முக2 ப்3ரஹ்மாகு ஸ்ருஜெஸி. தே சதுர்முக2 ப்3ரஹ்மொ மரீசிகு ஜெனெஸி. மரீசி மென்னாரு கஸ்யப ப்ரஜாபதிகு ஜெனெஸி. கஸ்யப ப்ரஜாபதி தீ3ஸுகு ஜெனெஸி. த்யே தீ3ஸு மனுகு ஜெனெஸி. மனு மென்னாரு ரஜானுகு பை3ல சக்ரவர்த்தி ஹொயெஸி.  ஏ மனு சக்ரவர்த்திகு இக்ஷ்வாகு உஜெஸி. ஏ இக்ஷ்வாகு மஹாரஜாகு பா3பு ஹொயெ மனு சக்ரவர்த்தி அயோத்4யா நக3ரி தி3யெஸி. த்யே அயோத்4யா நக3ரி இக்ஷ்வாகு மஹாரஜாகு பை2ல ராஜாங்கு3 ஹொயெஸி. எக வம்ஸிகு இக்ஷ்வாகு குலஸ்துன் மெனி நாவு ஜிடெ3ஸி. இக்ஷ்வாகுகு ப்ரஸித்3தி4 நாவு வஹே ககுக்ஷி உஜெஸி. ஏ க்குக்ஷி மஹாரஜாகு ப்ரஸ்தா2பஸாலி ஹொயெ விகுக்ஷி உஜெஸி. தே விகுக்ஷி மஹாரஜாகு மஹாதேஜஸ்ஸு ஸர ப்ரஸ்தா2பஸாலி ஹொயெ பா3ணு உஜெஸி. த்யே பா3ணு மஹாரஜாகு கீர்த்திவந்துகினி பு4ஜப3ல பராக்ரம ப3லிஷ்டு ஹொயெ அநரண்யு உஜெஸி. த்யே அநரண்யு மஹாரஜொ ராஜாங்கு3 சல்வெ காலுமு லோகுரு கொட்டிமு அநாவ்ருஷ்டி தோ3ஷு நீ:த்தொக்கினு கா3முரு ஜெனுனுகு சோருனு தா4கு நீ:த்தொ ஹொதெஸி. த்யே அநரண்யு மஹாரஜாகு ப்3ருது4 மஹாரஜொ உஜெஸி. ஏ ப்3ருது4 மஹாரஜாகு த்ரிஸங்கு2 உஜெஸி. ஏ த்ரிஸங்கு2 மஹாரஜொ வைராக்3ய ஸெத்து வவிலி விஸ்வாமித்ர மஹாமுனி லெந்த ஸெரிரு ஸெர தே3வ லோகுகு ஜியெஸி. த்யே த்ரிஸங்கு3 மஹாரஜொ மஹா கீர்த்தி ப்ரதாபு க2டெ3த்திஸா யுவநாஸ்வாகு ஜெனெஸி. ஏ யுவநாஸ்வ மஹாரஜாகு மாந்தா4து உஜெஸி. ஏ மாந்தா4து மஹாரஜாகு ஸுஸந்தி4 உஜெஸி. ஸுஸந்தி4கு த்4ருவஸந்தி4 மென்கினு ப்ரஸேனஜித்து மெனி தீ3 பெ3டான் உஜ்யாஸி. எமொ த்4ருவஸந்தி4 மென்னாருகு மஹாகீர்த்தி ப்ரதாபுலியே ஸத்ருமர்த2னு மென்கினு ப4ரது மென்கினு தீ3 பெ3டான் உஜ்யாஸி. எமொ ப4ரத மஹாரஜொ அஸித மஹாரஜாகு ஜெனெஸி. த்யே அஸித மஹாரஜொ அதிஸூரவீர பராக்ரமஸாலி ஹொயெ ஸக3ர மஹாரஜொ உஜெஸி.  ஏ ஸக3ர மஹாரஜொ ஒண்டொ ஸோவு அஸ்வமேத4 யாகு3 கெரெஸி. ஸெத்லொ தெட்3வாமு யாகா3ஸ்வொ தெ3க்கானாஜ்ஜத லோகஸ்கொ முகி3னு அப்3பு3னாத்தெக லெந்த ஸாட்ஸஸரு பெ3டானுகு த4ட்3டி3னு பதாள் லெந்து ஸொமுத்3ரு க2னடெ3ஸி. ஏ ஸக3ர மஹாரஜாகு அஸமஞ்ஜு உஜெஸி. அஸமஞ்ஜுகு அம்ஸமஞ்ஜு உஜெஸி. ஏ அம்ஸமஞ்ஜு மஹாரஜாகு தி3லீப சக்ரவர்த்தி உஜெஸி. த்யே தி3லீப சக்ரவர்த்திகு ப4கீ3ரது2 உஜெஸி. ஏ ப4கீ3ரத2 மஹாரஜொ தபோ ப3ல ஸக்தி லெந்த அகாஸு கெ3ங்கா3கு பு4ஞிரு லேதனெஸி. த்யே ப4கீ3ரத2 மஹாரஜாகு  ககுத்த2ஸு உஜெஸி. த்யே ககுத்த2ஸு மஹாரஜாகு ரகு4 மஹாரஜொ உஜெஸி. எககுலமுகு ரகு4குலம் மெனி நாவு ஜுடெ3ஸி. த்யே ரகு4 மஹாரஜாகு கல்மாஷபாதொ3 உஜெஸி. கல்மாஷபாத3 மஹாரஜாகு ஸங்க2ணு உஜெஸி. த்யே ஸங்க2ணு மஹாரஜாகு ஸூரு மென்கினு, ஸ்ரீமந்து மென்கினு ஸுத2ர்ஸனு மென்கினு தீ2ன் பெ3டான் உஜ்யஸி. எமொ ஸுத2ர்ஸன மஹாரஜாகு அக்3னிவர்ணு உஜெசி. அக்3னிவர்ணுகு ஸீக்4ரு உஜெஸி. ஸீக்4ருகு மரு உஜெஸி. மரு மஹாரஜாகு ப்ரஸுஸ்ரு உஜெஸி. த்யே ப்ரஸுஸ்ரு மஹாரஜாகு அம்ப3ரீஷ சக்ரவர்த்தி உஜெஸி. அம்ப3ரீஷ சக்ரவர்த்திகு நஹுஷு உஜெஸி. நஹுஷு மஹாரஜாகு நாபு4 உஜெஸி. த்யே நாப4 மஹாரஜாகு அஜுமென்கினு ஸுவ்ருது மென்கினு தீ3 பெ3டான் உஜ்யாஸி. எமொ அஜு மஹாரஜாகு ஸ்ரீராமசந்த்3ருகு பா3பு ஹொயெ த3ஸரத2  மஹாரஜொ உஜெஸி.

ஓ த4ர்மரஜா ! த்யே த3ஸரத2 மஹாரஜொ கௌஸல்யா, கைகேயி, ஸுமித்ரொ மெனெ தீ2ன் பை3லென் ஸர ஸாட் ஸஸர் ஒர்ஸு லெந்து ரஜாங்கு3 சல்விலேதவெஸி. த்யே த3ஸரத2 மஹாரஜாகு பா3ளுபோ2ளு நீ:த்தெக லெங்கொ3 ஒண்டொ ஸமயமு ஸுமந்த்ராதி3 மந்த்ரினுக்கினு வஸிஷ்டாதி2 புரோதுனுகு பொ3வன் த4ட்3டி3 அவடி3கினு தெங்க ஜோளு பா3ளுபோ2ளுகு கிஸொ கெருவாயி மெனி மெல்லுத ஸபி4குனைகினு, துமி புத்ரகாமேஷ்டி யாகு3 சல்வெதி பா3ளுபோ2ளு ஜுட3யி மெனி ஸங்கு3த ஹோந்த3கு மெனி மொன்னு ஸந்துஷ்டிலி து3ஸ்ஸுரந்தி3 தீ3ஸுஜாவுமு ரிஷ்யஸ்ருங்கா3தி2 மஹாமுனினுகு பொ3வன் த4ட்3டி3 அவடி3கினு யாக3 ஸாலொ நிர்மிதொ கெரடி3னு ஸுப4 முஹூர்துமு யாகு3 யெத்தன் கெரினு அபுல் பா4ர்யான் ஹொயெ கௌஸல்யா,  கைகேயி, ஸுமித்ராதே3வி ஸர, யாக3 தீ3க்ஷொ வஹிலி ர:த  ரிஷ்யஸ்ருங்கா3தி3 மஹாரிஷினு யாகு3  சல்வுத யஜ்ஞ புருஷு ஸந்துஷ்டிலி ப்ரஸன்னு ஹொய்னு ஒண்டொ ஸொன்னா பாத்ராமு பரமான்னு ஹொயெ பஸெமு லேதனி த3ஸரத2 மஹாரஜாகு தெ3த ஹௌஸுரு ஹாதும் க்3ரஹிலி த்யே பஸெமு தீ3வடொ கெரினு ஒண்டொ வடொ கௌஸல்யாகு தி3யெஸி. உராவு ரி:யெ ஹத்3து3 வடொ தீ3 வடொ கெரினு ஒண்டொ வடொ ஸுமித்ராதே3விகு தி3யெஸி. ஜத உராவுமு தீ3 வடொ கெரினு ஒண்டொ வடொ கைகேயிக்கினு பீ2ருராவு ஸுமித்ராதே3விகு தி3யெஸி.

ஸ்ரீ ராமவதாரு ஸங்கி3னி

  த்யே தி2னூ பா4ர்யானு பஸெம் க2ள்ளி க2யெவேங்கு3 தெம்தொகன் க3ர்போ4த3யு ஹொய்னு நொவ் ம:டொ3  ப2ராதுகு தெ3ஸ்வொ ம:டொ3 ஹொயெ சைத்ர ம:டா3மு ஸுக்ல பக்ஷமு நவமி திதி2மு புனர்வஸு நக்ஷத்ருமு கடக லெக்3னுமு து4பா3ரு வேளுமு கௌஸல்யா தே3விகு ஸ்ரீராமசந்த்3ருகினு தெக ப2ராது கைகேயிகு ப4ரதுகினு ஸுமித்ராதே3விகு லக்ஷ்மண  ஸத்ருக்4னுன் உஜ்யாஸி.  த3ஸரத2 மஹாரஜொ ஐகினு ஸந்துஷ்டிலி ஹௌஸாங்கு3 பொ4ரிலெத்தெனொ ஹொய்னு  கோ3 பூ4 ஹிரண்ய தா3னாதீ3னு பூ4ஸுருனுகு தீ3டி3னு தெக ப2ரா ஜாதகர்ம நாமகரணான்னப்ராஸன சௌளோபனயனுன் யதா2க்ரம ரீதிதா4னுகு முஸடி3னு பொ3டானுகு த4னுர் வித்3யாதி3 ஸஸ்த்ராஸ்த்ர வித்3யானு ஸிக்கடி3லேதுன் ஸுக2 ஆனந்து3ரு ராஜாங்கு3 ஸௌனிலேதொ3தெஸி.

 

ஓதி3 மெந்த அயோத்4யா நக3ரிகு விஸ்வாமித்ர மஹாமுனியவினு ரௌளு த்3வாரும் ஹிப்3பி3னு தேடு ர:கிலேதுன் ரி:யெ ப4டுன் ஜோளு மீ அவி ரி:யெஸி மெனி த3ஸரத2 மஹாரஜாகு ஜனடு3வென் ஸங்கி3 த4ட்3டு3த  ரஜொ ஐகினு திரகவி ஸாஷ்டாங்க3 நமஸ் கெரினு ஸர பொ3விலி ரௌளுமு கெ3கி3னு  உன்னதா3ஸனு ஹோரு பி3ஸடி3னு புஜெகெரி அர்க்4யம் தீ3டி3னு தீ3 ஹாதுன் ஜெத கெரிலி பாஞிபொடி3லின் ஹிப்3பி3னு,  ஹோ முனிஸேக2ரா ! மொர் ஜோளு காயி பஜெ ஹொய்யவ்யாஸி மெனி புஸுத, ரிஷி ஸெய்னு, ஓ த3ஸரத2 மஹாரஜா ! தூ ஸெத்து வவிலெத்தெனொ.  வாசு ஸிங்கு3நாத்தெனொ. த4ர்ம நீதி சல்னாரு த4ர்மாத்மு கைகீ.  பஜெ மெனெ தா4னுகு த்ருப்தி கெர்னாரு. ஸங்கு3ஸ் ஐகி.  அமியாகு3ன் சல்விலேதுன் ர:த கர்ம சண்டா3ளுன் ஹொயெ நிஸாசருனு மாம்ஸுகின் ரெகத் அனி ஹோமகுண்டா3மு லுச்வினு ஹோமு விக்4னு கெர்தொ2வஸுனு.   பா3தா3னு ஸஹன் முஸனி. ஹாலிமு ஸ்ரீராமசந்த்3ருகு மொர்ஸர த4ட்3யெதி ராக்ஷஸுனுகு மத்தைதி3னு யாகு3 பூர்திகெரிலி  பொ3ல்லன் ஸொடு3ஸு மெந்த,  ரஜொ ஐகிகினு, ஹா ! ராமசந்த்3ரு நெ:ன்ன பா3ளுனா,  தெ4ரி கி3ல்தகன்னா மெனி மொன்னு தி2தி3லி கி2ண்கி2ணைலி மூஸெல்லகி3 பொடெ3ஸி.    தெ2வ்ட3 கெ4டி3 ப2ராது ஜகி3லி ஹுடினு ஓ முனிஸத்தமா ! ராமசந்த்3ரு நெ:ன்ன பா3ளுனா.  ராக்ஷஸுனுகு மருவென் தெக ஹாலி முஸுனா.  மீ ரத2க3ஜாதி3 ஸகல சதுரங்க3 ஸைன்யானுகு பொ3ல்லவுஸு மெந்த, முனி ஐக்கிகினு தொரொ ஸஹாவு மொகொ வேஸு நீ:.   ராமமூர்தி ஒஜெனோஸி பு2ரொ மெந்த, பூ4பாலைகினு ரிஷிகு ராகவினு ஸாபனொ தீ3டை3கீ மெனி தி2கிலி திரக்வாசுவென் முஸுனாத்தொ ர:த கௌஸிக மஹாமுனி ஸெய்னு, ஓ ரஜா ! ராமசந்த்3ரு கோன்மெந்த தூ3து ஸுந்து3ருமு ஆதி3ஸேஷு ஹோரு ஸயனொ கெரிலி ரி:யெ ஆதி3 மஹா விஷ்ணு தே3வு. து3ஷ்டுனுகு ஸம்ஹருவென்கினு ஸிஷ்டுனுகு பரிபாலனொ கெருவென் பு4லோகுரு நராவதாரு க2டி3ன் ரி:யெத்தெனொ கைகீ.  தூ கொன்னி த4க்குனொகொ. மொர்ஸர த4ட்3டெ3 மெந்த.  த3ஸரத2 மஹாரஜொ ஹோந்த3கு மெந்தி  ராமலக்ஷ்மணுனுகு பொ3ல்லவடி3னு விஸ்வாமித்ர முனிஸர த4ட்3டு3த, முனி ஸ்ரேஷ்டு2 ஸந்துஷ்டிலி ரஜாகு தீ3வனொ கெரினு ராமலக்ஷ்மணனுகு ஸர க4ல்லிஜெயி ஒண்டொ ரேம்மு ஸ்நான் கெரடி3னு ஸந்த4யாவந்த3னானுஷ்டா2ன் முஸடி3னு  ராமலக்ஷ்மணனுகு ஸஸ்த்ராஸ்த்ர வித்3யான் ஸிக்கடி3னு ப3லா அதிப3லா மெனெ மந்த்ரோபதே3ஸு கெரெ வேங்கு3 அபுல் நிஜ ஸ்வரூபு களைலினு விஸ்வாமித்ரமுனிகு திரகௌலினு தும்ரொ ஹோகுதா4னுகு சல்லுவெஸி மென்னேதுன் சாஷ்டாங்க3 நமஸ்கெரினு தீ3 ஹாதுன் ஜெத கெரிலி பாஞிபொடி3லின் ஹிப்3பு3த, முனிஸ்ரேஷ்டு2 ஸந்துஷ்டிலி மொன் ஹௌஸுரு தீ3வன கெரினு ஸரக4ல்லி அபுலாஸ்ரமாகு ஜாதுன் ர:த வாடுமு பெ4ளி ப3ல பராக்ரம ஸர ரி:யெ தாடகிகு தெ3க்கினு, திரகவி விஸ்வாமித்ர முனி ஸ்ரீராமசந்த்3ரு போகு ஸெய்னு திகொ மாரி மெந்த ராமமூர்தி ஒண்டீஸ் பா3ணு ஸொடி3னு மத்தகுத,   கா3தி4 மஹாரஜாகு பெ3டொ ஹொயெ விஸ்வாமித்ர மஹாரிஷி ஸந்துஷ்டிலி ராமலக்ஷ்மணுனுகு ஸரபொ3ல்லி ஸித்3தா4ஸ்ரமாகு ஜைலந்தி3னு யாகு3 சல்விலேதுன் ர:த மாரீசுகினு ஸுபா3ஹு மெனெ ராக்ஷஸுன் தீ3ஜெனு மாம்ஸுகின் ரெகதுன் லேதனி ஹோமகுண்டா3மு லுச்வுத, கௌஸிகமுனி தெ3க்கினு  ராமு போகுஸெயி எங்கொ மத்தாகி மெந்த,  ஸ்ரீராமசந்த்3ரு லக்ஷ்மணு ஜோளு ரி:யெ வஞ்ளொ க2ள்ளினு பா3ணொ ஹில்கெளலி ஸுபா3ஹு ஹோரு விந்தி3னு ஜீவு ஹெட்டகெஸி. நீசு ஹொயெ மாரீசு தெ3க்கினு ஹத்3து3வாடும் பி2ரி த4ம் ஜியெஸி. தெக ப2ராது யாகு3 பூர்தி கெரினு விஸ்வாமித்ர மஹாமுனி ராமலக்ஷ்மணானு ஜோளு ஜனக மஹாரஜொ மிதி2லா நக3ரிமு ஸீதாகு ஹொராட்3 கெருவென் ப்ரஸித்3தி4 கெரின் ரி:யெஸி. அமி தேடி ஜியெங்கன் மெனி ஸங்கி3னு ஸர பொ3ல்லி மிதி2லா நக3ரிகு ஜா ர:த………. 

வாடுமு கௌ3தம மஹாமுனி ஜோளு ஸாபன க2ள்ளி தெ3கு3டொ3 ஹொய் பொடி3 ரி:யெ அஹல்யாதே3விகு ஸாப விமோக்ஷனொ கெரினு ராமலக்ஷ்மணுன் விஸ்வாமித்ரு ஸஹிது ஹொய்னு மிதி2லா நக3ரிம் கெ3கி3னு அபுல் அவ்னி ஜனக மஹாரஜாகு ஜனடு3த, ஐகினு, ஸந்துஷ்டிலி திரகவி ஸர பொ3ல்லி அவி பி4த்தராபனும் கெ3கி3னு கனகபீடொ2 ஹோரு பி3ஸடி3னு ஸாஷ்டாங்க நமஸ் கெரினு பாஞி பொடி3லி குஸலுன் புஸினு,  ஏ ரஜாபெ3டானு தீ3தெனு கோனு மெனி புஸ்த,   விஸ்வாமித்ரமுனி ஸங்க3ஸு.  ஓ ஜனக மஹாரஜா !  எனு அயோத்4யா நக3ரி ஸௌனிலேதுன் ரி:யெ த3ஸரத2 மஹாரஜா பெ3டானு, ராமலக்ஷ்மணுன் மெனி ஸங்கி3தினு ஸங்கரு வஞ்குளொ ஏட் அனாடி3 மெந்த, ஹோந்த3கு மெந்தினு சொவ்து3 ஸஸரு மென்க்யானுகு த4ட்3டி3 லேதனடி3 ஸபா4 மொ:த்3தி3ம் தொ2வடு3த ஸ்ரீதா3ஸரதி2 தெ3க்கினு விஸ்வாமித்ரு ஜோளு ஹோகு லியெத்தெனொ ஹொனு ஹுடினவி வஞ்ளொ ஹாதும் க2டி3னு ஹிப்3ப3டினு அகாஸு பு2ட்டத்திஸொ ஸப்3து ஸர தீ3வடொ கெரெஸி.

ஜனக மஹாரஜொ தெ3க்கினு ஸொந்து ஸர மொன்னௌ:ஸினி ஆனந்தா3ப்4ரனிம் பு3டெ3த்தெனொ ஹொய்னு அதி3ஸெம் பொடி3 ஸிலேதுன் ர:த விஸ்வாமித்ரமுனி ஸபி4குனுகைகாத்திஸொ, ஜனக மஹாரஜாகு ஸெய்னு ஸீதாகு ஸ்ரீராமசந்த்3ருகு தீ3கினு ஹொராடு3 முஸாடி3 மெந்த, ஜனக மஹாரஜொ ஹோந்த3கு மெந்தினு தத்க்ஷணமு த3ஸரத2 மஹாரஜாகு ஸுப4லேகு2 லிக்கின் ஜனடு3த, 

ஸொந்துஷ்டானந்து3ரு  லக்3னு நிஸ்சயு களைலினு ப்ரயாண பே4ரி வௌஜடி3னு ஸகல ரத2க3ஜாதி3 சதுரங்க3 ஸைன்யானுகு ரவணயத்தன் கெரடி3னு கௌஸல்யா கைகேயி ஸுமித்ராதி3னுக் கினு ப4ரத ஸத்ருக்4னுனுக்கினு வஸிஷ்டாதி3 புரோஹிதுனுக்கினு அருந்த4தி பை2லாதி3 புண்யாளினுக்கினு ஸுமந்த்ராதி3 மந்த்ரினுகு தெங்கொ தெங்கொ ஹொயெ தா4னுகு வாஹனானு நியமனொ கெரினு, ந்ருத்ய கீ3த வாத்2யுன் ஸர நிகுளுத, த3ஸரத2 மஹாரஜொ ஸகல தா3தி2தா3ஸ்துனு கு3ண்விலி ரெத்தும் ஹிங்கி3 பி3ஸினு ஸகல ஸைன்யுன் ஸர ரவண ஹொய்னு மிதி2லா நக3ரிகவி கெ3யெ(செரெ?) வேங்கு3 ஜனக மஹாரஜொ ஸகல புரோஹித மந்த்ரின் ஸஹித ப3ந்து4ன் ஸர தேகவுனு ஸர பொ3ல்லிலீ ஜெய்னு தெங்கொ தெங்கொ பஜெ  தா4னுகு அவாருன் தெ3க்கடி3னு ஸுப4 முஹூர்து நிஸ்சயு கெரிலீ ஸீதாகு ஸ்ரீராமசந்த்3ருக்கினு  ஸீதா பெ4ய்ன் ஹொயெ ஊர்மிளா தே3விகு லக்ஷ்மணுக்கினு ஜனக மஹாரஜாகு நெ:ன்ன பை4 ஹொயெ குஸத்4வ மஹாரஜா பெ3டின் மாண்ட3வீ ஸ்ருதகீர்தி மெனெ தீ3 பெ3ட்கினுகு ப4ரத ஸத்ருக்4னுனுகு தே3த்தெ மெனி நிஸ்சயு கெரில்யாஸி.

ஸீதா தே³விகு ஹொராடு³ கெர்னி

 

ஓ த4ர்மரஜா !  ஸுப4முஹூர்துமு ஹொராடு3 முஸடி3னு ஸகல ப3ந்து4மித்ருன் ஸர பட்ணப்ரவேஸு ஹொய்யவினு க3ந்த4 புஷ்பாதி3 பான் ஹப்பள் விடொ3 சல்வினு வெஸிந்தி3னுகு ஸகல மியார சல்வெ ப2ராது அபுல் பெ3டினுகு கோ3 பூ4 ஹிரண்யாதி3 ஸகல தா2தி2தா3ஸ்துனு ஸிக்3ரம் தீ3 த4ட்3டு3த த3ஸரத2 மஹாரஜொ வெஸிந்தி3ன் ஹொயெ ஜனக மஹாரஜ ஜோளு அயோத்4யாகு ஜவென் ஹோகு லியெத்தெனொ ஹொய்னு ஸகல ஸைன்யானு ஸர நொவ்ரா நொவ்ரினுகு பொ3ல்லி அபுல் கா3முகு ஜவென் நிகிளினவத் ர:த வாடுமு பரஸுராமொ மென்னாரு திரகவி கெ3ருவு வத்தான் கெரிலேதுன் ஓ ராமசந்த்3ரா ! தூ ஸங்கரு வங்குளொ மொட்டகெ ப3லிஷ்டு மெனி ஹட்விலின் ரி:யெத்தெனொ.  மீ ஸூர்ய வம்ஸிகு யோக3ள வீஸ்தோ2ரு லெந்து ஸம்ஹரிலேதவெத்திஸா ஏ விஷ்ணு தே3வு வஞ்ளொ ஹிப்3பா3டி3 மெந்த……………………….

ஸ்ரீராமமூர்த்தி த்யே ஐக்கிகினு முகுள்ஹஸாதோணுஸர துண்டிலி தெக ஹாதும் ரி:யெ த4னு ஜீவ ஸக்தி ஸர க்3ரஹிலி ஹிப்3ப3டி3 கெ2மினு தெமொ ஒண்டொ பா3ணொ ஹில்கௌலி  ஓ பரஸுராமா ! தொரொ பாஞினுகெ ஜீவு ஹெடு3ஸு மெந்த அபுல் பொ3லமுட்3கி3ன் ரி:யெ பரஸுராமு ஸ்ரீராமசந்த்3ருகு ஸெய்னு மெல்லஸு.  தொரொ பராக்ரமஸக்தி களைலெஸி. தூ து3ஷ்டுனுகு ஸம்ஹருவென்கினு ஸிஷ்டுனுகு பாலன கெரத்திஸா ஆதி3 விஷ்ணு தே3வுகைகீ.  தொக்கின் மொகொ பே4து3 நீ: ஹாலிமு தொரொ ஜயம்கினு மொரஜயம் ஒண்டோஸி மெனி ஸங்கி3தினு,  ஓ ராமா ! முல்லொ காஸ்யபுகு மீ பு4ஞிநாதி3 தா3ன் தி3யெ வேங்கு3 காஸ்யபு மொகொ ஸெய்னு ஓ பரஸுராமா ! அத்த ப2ராதுகு தூ ஏடு ரத்க (ஹத்3து3) கெ4டி3 மெள்ளி வஸன்ஹோனா.  மொகொ தா3ன் தி3யெ பு4ஞி ஸொடி3 தெக தெங்கு3டு3 வஸிலேதுன் ரா:ஜா மெந்த, தேடு ஒண்டொ நிமிஷு மெள்ளி ரா:னாத்தகு மஹேந்த்3ர கி3ரிரு ஜெயி ஜிவிலேதுன் ஸேத்தெக லெந்த மொரொ பாஞினுகு ஜீவு ஹெடெ3தி சல்ஜவென் முஸுன. ஹாலிமு மொரொ தபஸு லெந்த ஜுடெ3 புண்யபோ2ளு தி3யெஸி மெந்த, ஸ்ரீராமசந்த்3ரு தெக ஹோரு பா3ண ப்ரயோகு3 கெரெஸி. பரஸுராமொ ஸ்ரீராமசந்த்3ரு ஜோளு ஹோகு லீ மஹேந்த்3ர கி3ரிகு ஜைலந்தெ3ஸி.

தெக ப2ராது ஸ்ரீரகு4குலதிலகொ  பரஸுராமு ஜோளு ஜுடெ3 வஞ்ளொ பஸப்பதி  ஜோளு தீ3டி3னு மொன்னு ஸந்துஷ்டிலி பரஸுராமுகு தெ3க்கினு த4க்கி மூஸெல்லகி3 பொடி3 ரி:யெ அபுல் பா3பு ஜோள் அவி கினு பா3 ! பரஸுராமு ஜேடெ3ஸி மெனி ஸங்கி3னு தா4கு நிவாரண கெரெ வேங்கு3 ஜகி3லி ஹுடினு ராமமூர்திகு தெ3க்கினு ஸொந்துலீ ஸகல ஸைன்யானுகு பொ3ல்லி அயோத்4யா நக3ரிக் அவி லந்தி3னு கா3ம்மு கெ3கெ3 வேங்கு3 பே4ரி காஹளாதி3 வாத்3யுனு வௌஜுத மங்க3ளாளின் அவி ஸோப4னு கௌ3த, இத்யாதி3 வைப4வம் ஸர த3ஸரத2 மஹாரஜொ பி4த்தராபனும் கெ3யெ வேங்கு3 கௌஸல்யா  கைகேயி ஸுமித்ராதி3 லேமுன் ஸர பொ4வுண்டி3னுகு பொ3ல்லி த3ஸரத2 மஹாரஜாகு திரகு ஜியெ வேங்கு3 பொ4வுண்டி3னுகு தீ3வன கெரி த4ட்3டி3டி3னு ஸகல ஸைன்யானுகு தெகதெகா ரேமுனுகு ஜவென் ஹுகினு வஸிஷ்டாதி3 புரோஹித ப3ந்து4 மித்ருன் ஸஹிதம் த3ஸரத2 மஹாரஜொ நீதி திந்து3னாத்தொ ராஜாங்கு3 ஸௌனிலேதொ2தெஸி.

ஸ்ரீராமசந்த்3ரு ஸீதா ஸஹிது ஹொய்னு லக்ஷ்மணுகு ஸர வவிலி ஹொதெஸி. ப4ரத ஸத்ருக்4னுன் பா3பு ஜோளு ஹோகுலீ  ஐன்கா3ம் ஹொயெ கி3ரிவ்ரஜ நக3ரிகு ஜியாஸி.  இத்க வைப4வுன் ஸர த3ஸரத2 மஹாரஜொ ராஜாங்கு3 சல்விலேதொ2தெஸி மெனி ப்4ருங்க3 ரிஷி ஸங்கு3த த4ர்மரஜொ ஐகினு ஆனந்தா3ப்4ரனிம் பு3டெ3த்தெனொ ஹொய்னு ஸந்துஷ்டிலீ ஹொதெஸி.

ஸ்ரீ வால்மீகி ராமாயண ஸம்க்ஷேபு

பா3ல காண்டோ3

ஸம்பூர்ணு ஹொயெஸி.

ஸ்ரீரஸ்து.

------------------------------------------------------------------------------------------------

-------------------------------------------------------------------------------------------------------------

ஸௌராஷ்ட்ர ஸ்ரீ வால்மீக வசன ராமாயண ஸம்க்ஷேபு புஸ்தவும்கெ ஸெய்லி லிக்கிரியோ.. ஸ்ரீ வைகுண்ட முக்கோடி ஏகாதசி (21.12.2015) ஸுப4 தி3ன்னுமு ஒலா ஸ்தானும் (Internet m) ஹிங்க3ன்னி பொட3ரியொ(update kerariyO). Kondaa.S.Senthilkumar

ஸௌராஷ்ட்ர ஸ்ரீ வால்மீக வசன ராமாயண ஸம்க்ஷேபு

ஆசிரியர்